മലപ്പുറം: മഅ്ദിൻ അക്കാദമിയുടെ ഇരുപതാം വാർഷികാഘോഷമായ വൈസനിയം പരിപാടികളുടെ സമാപന സംഗമത്തിന്റെ പ്രചരണോദ്ഘാടനം കാസർഗോഡ് അഖിലേന്ത്യാ സുന്നി ജംഇയ്യത്തുൽ ഉലമാ ജനറൽ സെക്രട്ടറി കാന്തപുരം എ.പി അബൂബക്കർ മുസ് ലിയാർ നിർവ്വഹിച്ചു.
കുത്തഴിഞ്ഞ വിദ്യാഭ്യാസ രംഗവും അധാർമിക പ്രവണതകളും നാടിന്റെ സ്വാസ്ഥ്യം തകർക്കുമെന്ന് കാന്തപുരം പറഞ്ഞു. നാഥനില്ലാ കളരികളായി നമ്മുടെ കാമ്പസുകൾ മാറുന്നത് ആശങ്കയുളവാക്കുന്നതാണ്. വ്യക്തി - ആവിഷ്‌കാര സ്വാതന്ത്യത്തിന്റെ പേരിൽ വിദ്യാർത്ഥികൾക്കു നൽകേണ്ട ശ്രദ്ധ നൽകാതെ അരാജകത്വത്തിലേക്കു വിടുന്ന പ്രവണത അപകടകരമാണ് - അദ്ദേഹം പറഞ്ഞു.രണ്ടു പതിറ്റാണ്ടു കാലത്തെ മഅ്ദിൻ അക്കാദമിയുടെ മുന്നേറ്റം അഭിമാനകരമാണെന്നും ധാർമിക ബോധമുള്ള സമൂഹത്തെ സൃഷ്ടിക്കുന്നതിനുള്ള ഈ യത്‌നത്തിൽ എല്ലാവരുടെയും പിന്തുണ ആവശ്യമാണെന്നും കാന്തപുരം ഉണർത്തി. ഡിസംബറിൽ നടക്കുന്ന വൈസനിയം സമ്മേളത്തിന്റെ സന്ദേശം എല്ലാ വിഭാഗം ജനങ്ങളിലേക്കും എത്തിക്കുന്നതിന് എല്ലാവരും സജീവമായി മുന്നിട്ടിറങ്ങണമെന്നും അദ്ദേഹം ആഹ്വാനം ചെയ്തു.
ഈ വർഷം ഡിസംബർ 27 മുതൽ 30 വരെ മലപ്പുറം സ്വലാത്ത് നഗറിൽ നടക്കുന്ന സമ്മേളനത്തിന്റെ മുന്നോടിയായി രാജ്യത്തിനകത്തും പുറത്തും നടക്കുന്ന വിവിധ പ്രചരണ പരിപാടികൾക്ക് ഇതോടെ ഔദ്യോഗിക തുടക്കമായി. എല്ലാ ജില്ലാ കേന്ദ്രങ്ങളിലും രാജ്യത്തെ പ്രധാന നഗരങ്ങങ്ങളിലും വിദേശ നാടുകളിലും വിളംബര സമ്മേളനങ്ങൾ നടക്കും.
വിദ്യാഭ്യാസം, ആത്മീയം, പരിസ്ഥിതി, കാർഷികം, ആരോഗ്യം, കാരുണ്യം മേഖലകളിലായി ഇരുപത് ഇനങ്ങളിൽ നടക്കുന്ന വിവിധ പരിപാടികൾക്കൊടുവിലാണ് ഡിസംബറിലെ സമ്മേളനം. വൈസനിയത്തിന്റെ ഭാഗമായി സ്ഥാപിച്ച അഞ്ചു പുതിയ കാമ്പസുകളും ഇതിനു മുന്നോടിയായി സമർപ്പിക്കും.
സയ്യിദ് ഫസൽ കോയമ്മ തങ്ങൾ കുറാ, അധ്യക്ഷനായിരുന്നു. സയ്യിദ് ഇബ്‌റാഹീമുൽ ഖലീൽ അൽ ബുഖാരി, സയ്യിദ് ഇബ്‌റാഹീം പൂക്കുഞ്ഞി കല്ലക്കട്ട, ആറ്റക്കോയ തങ്ങൾ ബാഹസൻ, അബ്ദുറഹ്്മാൻ ശഹീർ അൽ ബുഖാരി, സയ്യിദ് അലവി തങ്ങൾ, ബി.എസ് അബ്ദുള്ളക്കുഞ്ഞി ഫൈസി, പള്ളങ്കോട് അബ്ദുൽ ഖാദിർ മദനി, ഇബ്‌റാഹീം ബാഖവി മേൽമുറി, ഹമീദ് മൗലവി ആലംപാടി, കൊല്ലമ്പാടി അബ്ദുൽ ഖാദിർ സഅ്ദി, മുഹമ്മദ് സഖാഫി പാത്തൂർ സംബന്ധിച്ചു.